Gel şefâ‘at kıl dîzârıñı görem yâ Mustafâ

Gel şefâ‘at ḳıl dîẕârıñı görem yâ Muṣṭafâ

Boynum egüben naẓarıñda ṭuram yâ Muṣṭafâ

Sen ki Yûsuf Mıṣra sulṭân ben Zelîḫâyam bugün

Yâ ne vaḳtin nûr-ı vaṣlıña irem yâ Muṣṭafâ

Bülbülem ‘aşḳıñ elinden eylerem âh u fiġân

Vaḥdetiñ bâġında gülleriñ direm yâ Muṣṭafâ

Ḫûb cemâliñ şem‘ine pervâneyem ey luṭfı çoḳ

Görsem envârıñı zârım arturam yâ Muṣṭafâ

Aşḳ derdiñ câna pür-tâb eyledi bir ẕerrece

Gelmişem meydân-ı ‘aşḳa Manṣûram yâ Muṣṭafâ

Keşf ḳılsañ sırr-ıla câna ledünnî ‘ilmini

Niçedür ‘âşıḳlarıña gösterem yâ Muṣṭafâ

Cân u dil dir ‘aşḳıñ-ile ‘âleme rüsvây olam

Nâmûs u ‘ârım şişesin ben ṣıram yâ Muṣṭafâ

Göñlümi yaġmaladı derdiñ beni ḳıldı fenâ

Her kimi görse gözüm seni soram yâ Muṣṭafâ

Ḫalḳ-ı ‘âlem ḥâliniñ her biriniñ var bir işi

Rûz u leylî her dem işim ben direm yâ Muṣṭafâ

Yüz ḳaralıġından âḫar armaġanum yoḳ saña

Cân u dil her dem saña ider kerem yâ Muṣṭafâ

Leylî yüzüñ ḥasretinden ḳalmadı ṣabr u ḳarâr

Mecnûn oluban yoluñda ben ṭuram yâ Muṣṭafâ

Cân fedâ olsun cihân şâh begi berri yoluña

Ḳal‘a-i gevher-nigînden umaram yâ Muṣṭafâ

Derdiñ urdı yüregime şerḥa şerḥa yaralar

Sen şefâ‘at merheminden vir ṣaram yâ Muṣṭafâ

Çâr-ı yâriñ ẕevḳını keşf ideliden cânıma

Sırlarına çoḳ ṯenâlar iderem yâ Muṣṭafâ

İzzet-i luṭfuñdan irdi cân senüñ esrârıña

Kimse bilmez kim bu dil ne söylerem yâ Muṣṭafâ

Himmet ile dü cihânıñ bâġına bend olmayam

Menzilüm saña irinceydek sürem yâ Muṣṭafâ

Dir Sinân Ümmî ḳaçan kim vâṣıl ola cân saña

Dü cihân ẕevḳı baña olsun ḥarâm yâ Muṣṭafâ