Gel temâşâ kıl ne söyler ‘âşık-ı divâneler

Gel temâşâ ḳıl ne söyler ‘âşıḳ-ı divâneler

Cür‘a-i Seb‘u’l-meṯânîden içen mestâneler

Mâsivâ renginden aṣlâ ḳomamış nâm ü nişân

Vaḥdetiñ deryâsına ġavvâṣ olan şâhâneler

On sekiz biñ ‘âlemi terk eylemiş öñden ṣoña

Cümle ‘ilmiñ ma‘nisi baḥrındaki dürdâneler

Küllî varlıḳ maḥv olıncaḳ ġayrı ḳalmaz arada

Küntü kenze maẓhar olur ṣâdıḳ-ı merdâneler

İşiden innî ene’llâhdan ḫıṭâbı dem-be-dem

Sem‘ine girmez anuñ hiç ġayrıdan efsâneler

Gizli râzı gün gibi fâş eyler ol bî-iḫtiyâr

Gün gibi günden ‘ayân olup gelen ḫum-ḫâneler

Maḥrem-i ẕât-ı İlâhîsin bugün ḥaḳḳa’l-yaḳîn

Ey Sinân Ümmî ne bilsün sırrıñı bî-gâneler