Gel ey sâhib-me‘ânî gör nazar feyż-i İlâhîden

Gel ey ṣâḥib-me‘ânî gör naẓar feyż-i İlâhîden

Ḳulaḳ ṭut cân-ıla diñle ḫaber feyż-i İlâhîden

Muṣaffâdur bugün ḳalbim dü ‘âlem mâ-cerâsından

Göñül bir şey’e żamm olsa keser feyż-i İlâhîden

Eger sen ‘ilmin isterseñ ḥaḳîḳat tevḥîd-i ẕâtıñ

Gözüñ aç ḳıl naẓar gör ne ṭoġar feyż-i İlâhîden

Temâmet anı ẕikr itmek hemân ẕâtına maḫṣûṣdur

Egerçi külli ẕâkirdür eṯer feyż-i İlâhîden

Muvaḥḥiddür anuñ ẕâtı ebed hergiz ḳarâr itmez

O ẕikriñ mevcidür envâr süzer feyż-i İlâhîden

Ḳaçan kim baḥr-ı muṭlaḳdur bu ẕikriñ pertevi ṭolsa

Gelür ol ẕât-ı nûrına baṣar feyż-i İlâhîden

Pes andan ẕât-ı nûrîde ḳılur tevḥîdine iḳrâr

Ḥaḳâyıḳ iḳlîmin ḳaplar gelür feyż-i İlâhîden

Ḥaḳâyıḳ ‘âlemi oldur ḳılur mevci hezârân biñ

Füyûż eyler ki her cinse bulur feyż-i İlâhîden

Ḥaḳâyıḳ intihâsında idindi kendüye maḥbûb

Ḥabîbinden ḳılur her şey yazar feyż-i İlâhîden

Ḥaḳâyıḳda ḳamu insân bu tevḥîdiñ kemâlidür

Kimi mürsel kimi ekmel düzer feyż-i İlâhîden

Didi ıṭlâḳıyetinde Hû lâ-ilâhe illâ Hû

Pes andan Aḥmediñ ẕâtı olur feyż-i İlâhîden

Eḥadiyyetde çün didi Hû lâ-ilâhe illâ Hû

Ḥaḳîḳat-i mürselîn anda olur feyż-i İlâhîden

13 Didi çün vâḥıdiyyetde Hû lâ-ilâhe illâ Hû

Nebîler ġayrı mürseller olur feyż-i İlâhîden

Bu üç nev‘-i ḥaḳîḳatlar olupdur ẕâtına maẓhar

Velâkin Muṣṭafâ ekber alur feyż-i İlâhîden

Eḥadiyyetde çün didügi lâ-ilâhe illâ Hû

Ḥaḳâyıḳ evliyâ anda olur feyż-i İlâhîden

Didi pes vâḥıdiyyetde ki lâ-ilâhe illâ Hû

Ḥaḳâyıḳ-ı muḳarrebler olur feyż-i İlâhîden

Didi çün ḫâlıḳıyyetde ki lâ-ilâhe illâ Hû

Pes ebrâr-ı ḥaḳâyıḳlar olur feyż-i İlâhîden

Bu üç nev‘-i ḥaḳîḳatlar olupdur vechine maẓhar

Velâkin cümle ḥâlince alur feyż-i İlâhîden

Kesilmez pertevi hergiz o baḥrıñ bir nefes añla

Her eşyâ her bir ism-ile umar feyż-i İlâhîden

Her eşyâ mevcidür anuñ atar deryâ-yı muṭlaḳdan

Ḳamu yer gök ṭolar eşyâ bezer feyż-i İlâhîden

Yaratdı evvelâ ‘arşı ki düzdi altına kürsî

Ḳamu gökler olup ṭolâb döner feyż-i İlâhîden

Bilüñ kim baḥr-ı muṭlaḳdan bu tevḥîdiñ kemâlâtı

Żıyâ alur nücûm u şems ḳamer feyż-i İlâhîden

Ne kim var cümle maḫlûḳât ḳamu andan alur ḳuvvet

Melek cin div eger şeyṭân beşer feyż-i İlâhîden

Eger berren eger baḥran çün anuñ pertevindendür

Deñiz ḳa‘rındaġı maḫlûḳ ḳanar feyż-i İlâhîden

Seḥâb olur göge aġar maṭar olur yere yaġar

Ḥayât bulur virür her şey ṯemer feyż-i İlâhîden

Kimin ṣâfî celâl eyler kimin ṣâfî cemâl eyler

Ḳamusından bulur insân ṭoġar feyż-i İlâhîden

Sekiz cennet münevverdür müzeyyendür cemâlinden

Yedi ṭamu celâlidür ḳızar feyż-i İlâhîden

Eger ẓâhirde var ṭaġlar eger bâṭında var bâġlar

Ẓâhir bâṭın aḳup çaġlar ṣular feyż-i İlâhîden

Uçan ḳuşlar esen yeller anuñ ismin oḳur diller

Biten ezhâr u sünbüller ḳoḳar feyż-i İlâhîden

Anuñ ismin soran kimse müsemmâdan bulur envâr

Muvaḥḥid ẕâkiriñ ḳalbi ṭolar feyż-i İlâhîden

Anuñdur ‘izzet ü nuṣret hem oldur sâni‘-i ḳudret

Bu taḳdîri ḳalem levḥa yazar feyż-i İlâhîden

Gider ḳış yaz olur eyyâm yaġar yaġmur biter en‘âm

Gice gündüz döner aḫşam seḥer feyż-i İlâhîden

Ḥaḳâyıḳ iliniñ ismin didiler ba‘żılar lâhût

Ammâ andan ötesidür gelür feyż-i İlâhîden

Daḫı andan ötesine melek mürsel nebî ṣıġmaz

Buña göre ḳıyâs eyle yanar feyż-i İlâhîden

Anuñ sırrı münezzehdür aña efkâr u ‘aḳl irmez

Liyâḳatınca ‘ârifler yazar feyż-i İlâhîden

Niçe biñ merd-i kâmiller tamâm cehd itse biñ yıllar

Muḥâlen-der-muḥâlendür yeter feyż-i İlâhîden

Sinân Ümmî bugün ġavvâṣ olup deryâ-yı vaḥdetden

Ḥaḳâyıḳ baḥrınıñ dürrin dizer feyż-i İlâhîden