Gel ey kâmil kemâlâtıñ gülâbın virdüm añlarsañ

Gel ey kâmil kemâlâtıñ gülâbın virdüm añlarsañ

Çevir dilden yedi çerḫıñ dolâbın virdüm añlarsañ

Merâtib vaṣfın isterseñ yedi üç ḳırk ṭokuz birdür

Saña elfâẓ-ı ma‘nâdan ḥisâbın virdüm añlarsañ

Ḫudânıñ ism-i ẕâtından yazıldı ‘ayn ü şîn ü ḳâf

Ledünnî ‘ilminiñ dersi kitâbın virdüm añlarsañ

Ṣalât ü ṣavm-ıla ḥaccıñ enâcir ḫurmâ nâr a‘nâb

Saña evṣâf-i ebrârıñ ṯevâbın virdüm añlarsañ

Göñülde varsa ġayru’llâh ‘adâvet eyler ol Allâh

İşit Sulṭân-ı a‘lânıñ cevâbın virdüm añlarsañ

Özime sırr-ı Sübḥânıñ gelen ilhâmıdur şeksiz

Saña ol nûr-ı Yezdânıñ ḫıṭâbın virdüm añlarsañ

Eger dünyâ eger ‘uḳbâ olupdur başıma zindân

Duya gör ‘ârif-i bi’llâh ‘aẕâbın virdüm añlarsañ

Yüzüm güler özüm aġlar görürsin bu fenâ mülke

Murâdım olduġın ṣoymaḳ ḥicâbın virdüm añlarsañ

Yanar cânında derd odı Sinân Ümmî degüldür ṣaġ

Başında ḥükm iden sevdâ niḳâbın virdüm añlarsañ