Gel ey bâd-ı sabâ lutf eyle bir dem

Haber ver bize cânân illerinden

Beşâretle bizi kıl şâd u hurrem

Haber ver bize cânân illerinden

Aradım nice yıl kevn ü mekânı

Bulunmadı anın nâm u nişânı

Aceb nice bulur isteyen anı

Haber ver bize cânân illerinden

Seherde açılan güllerde midir

Yahûd efgân eden dillerde midir

Akan suda esen yillerde midir

Haber ver bize cânân illerinden

Ol ilden azm edince bu cihâna

Tamuya uğrasan döner cinâna

Tesellî ver kulûb-ı âşıkâna

Haber ver bize cânân illerinden

Harîm-i kuds-i lâhûta varırsan

Sarây-ı hâss-ı cânânı görürsen

Yine azm eyleyip bunda gelirsen

Haber ver bize cânân illerinden

Nesîm-i feyz-î akdes bahr-ı cûdun

Havâdisden mukaddesdir vücûdun

Cemâl-i zât-ı a'lâdır şuhûdun

Haber ver bize cânân illerinden

Eğer cân ise hüsnünün bahâsı

Nice bin cân anın olsun fedâsı

Niyâzî'nin kadîmî âşinâsı

Haber ver bize cânân illerinden

Son Yazılar