Gel ey ‘akl-ı safâ ehli nedür ma‘nâ sorarsañ gel

Gel ey ‘aḳl-ı ṣafâ ehli nedür ma‘nâ ṣorarsañ gel

İçüp ‘aşḳıñ şarâbından bu tevḥîdi sürerseñ gel

Ṭakın bu seyfiñ aḳvâsın cihâdü’l-ekberi añla

Ḥicâb-ı mâsiva’llâha fenâ virüp ḳırarsañ gel

Şu söz kim söylene dilde müsemmâsı gerek elde

Kitâbıñ ma‘nîsin añla göñül dersin ṣorarsañ gel

Dilimde söylenen aḫbâr ḥâlimde keşf olan esrâr

Saña ma’lûm idem anı dü ‘âlemden ırarsañ gel

Göñül emrâżına ḳâldan bulunmaz ‘aḳl-ıla dermân

Bu sırra olmuşam Loḳmân eger merhem ṣararsañ gel

Ṭaş u ṭopraḳ ṭavâfından vefâ bulmadı ‘âşıḳlar

Âşıḳıñ ḳalbidür Ka’be ḥac u ‘umre iderseñ gel

Delilim mürşid-i kâmil ṭanuġum tevḥîd-i esmâ

Gümâna düşmesün nefsiñ bu menzile irerseñ gel

Bugün vaḥdet nişânından âḫar yerden cevâb itme

Ledünni baḥrınıñ kânı ki bir ḳaṭre ararsañ gel

Sinân Ümmî olup sâḳi eline câm-ı ‘aşḳ aldı

Ḳoyup nâmûsı ey zâhid mey ü ṣoḥbet sürerseñ gel