Gel berü ey lâ-mekân şehrinde kılan seyr-i yâr

Gel berü ey lâ-mekân şehrinde ḳılan seyr-i yâr

Nâ-murâd ol dü-cihânıñ naḳşına ḳılma naẓar

Meyl idüp mülk-i Süleymâna ıraġ olma şehâ

Tâ ki dildâr illerinde olmayasın ḫôr u zâr

Ġâfil olma ḳıl ḥaẕer bunda giriftâr olmadan

Dü-cihânıñ leẕẕetinde ‘aşḳ-ıla eyle firâr

Ger dilerseñ kim bulasın anda sen dârü’s-selâm

Gel fenâdan öñ fenâ ol gel fenâ ḳıl iḫtiyâr

Ġam yime dârü’l-belânıñ miḥnetinden fâriġ ol

Eyleme hergiz ḳarâr kim bulına dârü’l-ḳarâr

Gir belâ meydânına gel yoḳluġı eyle ḳabûl

Tâ varup seyr-i ma‘a’llâh seyrine ire bâzâr

Aşḳ-ı derdiñ şiddetinden fâriġ olma ey göñül

Tâ visâl-i nevrûzından açıla yevmü’l-bahâr

Baġlayupdur on sekiz biñ ‘âlemiñ bendindesin

Ẕât-ı ‘aşḳ-ıla seni sen avlayup eyle şikâr

Hey ecel peymânesinden ṣunmadın çarḫ u felek

Ġâfil olma ġâfil olma gözüñ aç cânıñ uyar

Câmı cânânıñ elinden nûş umarsañ ‘aşḳ-ıla

Başı meydâna ḳoyup cânı fedâ ḳıl yüri var

Her kime cânân gerekse cânına aġyâr olur

Bil cihândan geçmeg-ile kimse bulmaz vaṣl-ı yâr

Ḳanı şol dünyâ sarâyında getür kimdür bulan

Aḳl u cândan geçmeden kim bulısardur baḫtiyâr

Bî-nişân u lâ-mekânıñ illerinde şâh olan

Aşḳ-ıla derde giriftâr oldılar çün bî-şümâr

Kim ki ‘aşḳ-ıla fenâda zâr u giryân olmadı

Ḳalısar yevmü’l-cezâ şehrinde bî-şek âh u zâr

Ey Sinân Ümmî saña yâr olmaġa yarın o şâh

Gel bugün bu âyin ü erkânı eyle târ-u-mâr