Gamzen füsûn ile sühan eyler nezâketi

Gamzen füsûn ile sühan eyler nezâketi

Çeşmin nigâh şekline kor nâz u nahveti

Aldın hadeng-i cevrini sînemde koymadın

Ey kaşları kemân katı cevr eyledin katı

Geh sürme gâh vesme vü gâhî piyâle çek

Ey serv-i nâz çekme yeter gayri kâmeti

Deryâ-yı aşka dün beni baştarda eyledi

Bir dâne al fesli Cezâyirli âfeti

Sînemde aşkını tutalım etmişim nihân

Ammâ ki kande saklayayım âh-ı hasreti

Aldım kocup miyânını bir tatlı bûsesin

Ammâ ki yakdı ağzımı sandım harâreti

Hep kullarını etdi o kân-ı kerem çerâğ

Zannım budur ki geldi Nedîmin de nevbeti

Düstûr-ı Cem-şükûh keremkâr-ı rûzgâr

Zâtiyle buldu sadr-ı şeref zîb ü ziyneti

Sadr-ı bülend-rütbe ki ben yalnız değil

Hâk olmadır derinde sipihrin de niyyeti

Lutfiyle sîrim öyle ki her mûyumu benim

Etdikce cüst ü cû bulunur nân u niʿmeti

Hakkâ budur ki gökdeki hurşîd bulmadı

Ben sâyesinde bulduğum ikbâl ü rifʿati

Âvîze kıl duʿâsını tâ arş tâkına

Ey âh-ı nîm-şeb sana Allah emâneti