Eyâ cânlar içinde cân fedâdur yoluña cân baş

Eyâ cânlar içinde cân fedâdur yoluña cân baş

Be-ḥaḳḳ-ı âyet-i Ḳur’ân fedâdur yoluña cân baş

Göñüller derdine dermân fedâdur yoluña cân baş

Efendim Maẓharî Sulṭân fedâdur yoluña cân baş

Eyâ kâmil arasında ledünnî ‘ilmine kânım

Yüzüm sürmege pâyıña güz eyyâmın küyer cânım

Ḳarârım yoḳ benüm sensiz ki sensin dînim îmânım

Efendim Maẓharî Sulṭân fedâdur yoluña cân baş

Yañıldum gerçi işimde ki bir yañlış bâzâr itdüm

Ḫaṭâmız ṭutma luṭf eyle dönüp andan güzâr itdüm

Ḳurâb adıyla bülbülüñ adın añmaġa ‘âr itdüm

Efendim Maẓharî Sulṭân fedâdur yoluña cân baş

Bilürsin derd-i ‘aşḳıñla ki muḥkem baġladum özüm

Güderem ḳanda giderseñ iziñden ırmazam gözüm

Eger cehrî eger maḫfî ki va’llâhi budur sözüm

Efendim Maẓharî Sulṭân fedâdur yoluña cân baş

Gümânum gitdi bi’llâhi ki buldum sırrıñı bende

Fırâḳıñ âteşi her dem ḳarâr itmez yanar cânda

Eger yaḫşı eger yatlı olupdur bâbıña bende

Efendim Maẓharî Sulṭân fedâdur yoluña cân baş

Senüñ himmet-i ‘âliñle gelür bu dilime sözler

Ḳaṭaram aġzıña lâyıḳ her âdem aşına ṭuzlar

Kör olsun iki ‘âlemde iki yüze baḳan gözler

Efendim Maẓharî Sulṭân fedâdur yoluña cân baş

Bi-ḥamdi’llâh pirim buldum gerekmez ġayrı pir baña

Bi-ḥamdi’llâh yârım buldum gerekmez ġayrı yâr baña

Bi-ḥamdi’llâh nûrum buldum gerekmez gayrı nûr baña

Efendim Maẓharî Sulṭân fedâdur yoluña cân baş

Bu mıdur ẓannıñ ey şâhım uyam ‘âlemde aġyâra

Ṭoḳunmasun diyü lâkin müdârâ eylerem ḫâra

İrelden dest-i dermânıñ oñuldı bende hep yâra

Efendim Maẓharî Sulṭân fedâdur yoluña cân baş

Sinân Ümmî senüñ yoluñda bir ḳâṣır keşifiñdür

Hemişe mürvetiñ umar ki bir ‘âciz żâ‘îfiñdür

Teraḥḥum ḳıl kerem eyle ki bî-çâre naḥîfiñdür

Efendim Maẓharî Sulṭân fedâdur yoluña cân baş