Ey vücûduñ ‘aşkına fermân iden

Ey vücûduñ ‘aşḳına fermân iden Perverdigâr

Aşḳını ‘irfânına burhân iden Perverdigâr

Küntü kenziñ sırrı ıẓhâr olmadan pinhâniken

Nûr-ı vechin Aḥmedine cân iden Perverdigâr

Hem buyurduñ şânına levlâke levlâk ol cânıñ

Muṣṭafâyı cümleye cânân iden Perverdigâr

Şâhidim ḳıldum şahâdet ḥaḳ Muḥammeddür Resûl

Mu‘cizâtıñ âyeti Ḳur’ân iden Perverdigâr

Ḥikmetiñ levḥine baḳsam ‘aḳlım olur târumâr

Od u ṣu ṭopraġ u yel insân iden Perverdigâr

Cümle ‘âlem dest-gîridür Ḥabîbiñ bî-gümân

Enbiyâlar serveri sulṭân iden Perverdigâr

Ol didi ben şehr-i ‘ilmüm ḳapusıdur Murtażâ

Evliyâ ser-çeşmesin merdân iden Perverdigâr

Ancalar ‘aşḳıñ yolında cân u baş terk eyledi

Meskeni derd ü belâ meydân iden Perverdigâr

Ḥasretiñden âh idüp nâlân iderler her seḥer

Âşıḳıñ gözlerini giryân iden Perverdigâr

Vuṣlatıñ peymânesinden içmeyen bî-gânedür

Sırrını ‘ârifleriñ seyrân iden Perverdigâr

Gerçi ḳılmışdur Sinân Ümmî ḫaṭâlar bî-şümâr

Ey ḫaṭâyı luṭfıla pinhân iden Perverdigâr