Ey pâdişâhımkıl nazar

Ey pâdi şâhım ḳıl nazar

Vech-i ẓâtıñ ḥaḳḳı yâ Rab

Cân vaslıñı senden umar

Ḥüsn-i ẕâtıñ ḥaḳḳı yâ Rab

Benim işim dâ’im ḫaṭâ

Seniñ işiñ dâ’im ‘aṭâ

Eyleme vaslıñdan cüdâ

Sırr -ı ẕâtıñ ḥaḳḳı yâ Rab

Âşıḳlarıñ bulduḳları

Düşüp ġavvâs olduḳları

Özin yavı ḳılduḳları

Baḥr -ı ẕâtıñ ḥaḳḳı yâ Rab

İy bizi yoḳdan var iden

Ḳurtar bizi mekkâreden

Âlemleri envâr iden

Nûr-ı ẕâtıñ ḥaḳḳı yâ Rab

Ey keremler kânı vâce

Biz ednâyuz eyle yüce

Muḥammed çıḳup mi‘râca

Vasl -ı ẕâtıñ ḥaḳḳı yâ Rab

Yâ İlâhî sen ḳıl çâre

Ulaşdur bizi sen yâre

Sır ilinde ‘âriflere

Ḳurb-ı ẕâtıñ ḥaḳḳı yâ Rab

Kâmillerden irşâd olan

Göñüllerde bünyâd olan

Cümle dillerde yâd olan

İsm-i ẕâtıñ ḥaḳḳı yâ Rab

Er -zâdeniñ pîr -zâdeniñ

Sırrındaki sır -zâdeniñ

Var içinde var -zâdeniñ

Varı ẕâtıñ ḥaḳḳı yâ Rab

Zuhûrîniñ Maẓharîniñ

Cân içinde cânlarınıñ

İrdügi sen dildârınıñ

Aşḳ -ı ẕâtıñ ḥaḳḳı yâ Rab

Eyle fenâ -ender -fenâ

Buldur beḳâ -ender -beḳâ

Ḥaḳî ḳatıñ kân-ı ‘aṭâ

Baḥr-ı ẕâtıñ ḥaḳḳı yâ Rab

Enbiyânıñ evliyânıñ

Virmedükleri nişânıñ

Lâ -te‘ayyün olan senüñ

Künh -i ẕâtıñ ḥaḳḳı yâ Rab

Ümmî Sinân ḳuluñ cânı

Görmek diler ‘ayân seni

Maḥrûm eyleme gel anı

Ayn -i ẕâtıñ ḥaḳḳı yâ Rab