Ey mürüvvet ma‘deni sâhib-velâyet Murtażâ

Ey mürüvvet ma‘deni ṣâḥib-velâyet Murtażâ

V’ey Ḫudânıñ arslanı ‘ayn-ı hidâyet Murtażâ

Haḳ resûli Faḫr-i ‘âlem nûr-ı vâḥid dir saña

Hel etâ geldi senüñ şânıñda âyet Murtażâ

Ol ki ḳudret ḳandilinde vâḥidün min nûr iken

Cibri’île mürşid olduñ buldı râḥat Murtażâ

Fehm olındı evvel âḫır uyılan kimdür ne ġam

Senden oldı iṯnâ ‘aşer nev‘-i imâmet Murtażâ

Senden irdi ‘ârife ‘ayne’l-yaḳîn ḥaḳḳa’l-yaḳîn

Evliyâlar serveri ṣâḥib-emânet Murtażâ

Bâbı sensin cümle ‘ilmiñ şehri şâh-ı Muṣṭafâ

Kenz-i a‘ẓam ḳapusın buldı cemâ‘at Murtażâ

Kim yaman ṣanursa saña sen aña ḳılduñ ‘aṭâ

Sen keremler kânısın ehl-i seḫâvet Murtażâ

Münkir olan ḥażretiñe bulmayısardur ḫalâṣ

Saña âmennâ diyen buldı selâmet Murtażâ

Ḥayf ola Ḥaḳdan ḥaḳir ola mı hergiz necât

Kim ki sen sulṭâna ḳılmadı iṭâ‘at Murtażâ

Sırruke sırrî buyurdı şânıña Ḫayrülbeşer

Küntü kenziñ maẓharı ehl-i sa‘âdet Murtażâ

Görmedigüm Tañrıya ṭapman didüñ ḥaḳdur sözüñ

Senden artuḳ kim ḳıla Ḥaḳḳa iṭâ‘at Murtażâ

Yâ ‘Alî Ebü’l-Ḥasansın hem Ḥüseyn-i Kerbelâ

Dürr ü cevher ma’deni ehl-i şehâdet Murtażâ

Himmetiñ peymânesidür ‘âlemi ḥayrân iden

Ey velîler serveri ṣâḥib-kerâmet Murtażâ

Mâh-ı vechiñ ḳıblesidür ‘âşıḳıñ ervâḥınıñ

Devlet anuñdur niyâz itdi nihâyet Murtażâ

Lebleriñ çeşmesidür âb-ı ḥayvân añladum

Hem zebânıñdur senüñ ḳând-ı melâḥat Murtażâ

Gözleriñ ḫışmından oldı kâfiriñ zehresi çâk

Ḫarb-ı tîġiñdan irişdi küfre ġâret Murtażâ

Sen ‘aṭânıñ baḥrına baḥrisin ey cânlara cân

Külli şey hep sende buldı cümle ḥâcet Murtażâ

Ârifiñ ḳalbine ḥubbüñ gün gibi virdi żıyâ

Fâsıḳıñ göñline ẓulmet ü nifâḳat Murtażâ

Sen şeh-i merdân-ı ‘âlem ‘ârifiñ burhânısın

Sâḳî-i Kevṯer ü ebrâr-ı cemâ‘at Murtażâ

Kim ki sen şâhıñ ḫayâli ḥubbına dil virmedi

Dü cihânda gitmedi andan kerâhet Murtażâ

Ol cevâhir ma‘deni ḫulḳ-ı ‘aẓîmiñdür zîbâ

Pes Necef ırmaġına ḳılduñ işâret Murtażâ

Lâ fetâ illâ ‘Alî lâ seyfe illâ ẕü’l-fiḳâr

Kenz-i maḫfîdür saña kân-ı hidâyet Murtażâ

Ṣad hezârân şükr ü minnet Ḫâliḳ u Yezdânıma

Göñlüme ḳıldı binâ ḥubbuñ ‘imâret Murtażâ

Biñ yıl ‘ömrüm olsa şerḥiñden lisâna ġam degül

Bulmadum ‘aşḳıñ zülâlından ḳanâ‘at Murtażâ

Cânı biñ olsa fedâdur yoluña Ümmî Sinân

Mürvetiñ ḥaḳḳı anı ḳılma firâḳat Murtażâ