Ey Hudâ kimdür hużûruñda bulan senüñ kemâl

Ey Ḫudâ kimdür ḥużûruñda bulan senüñ kemâl

Pes bulan sensin senüñdür çünki ḥükm-ile kemâl

Kim ola kim ẕât-ı muṭlaḳdan seni muṭlaḳ bile

Pes bilen sensin senüñdür çünki keşf-ile kemâl

Kim ola kim ḥażretiñ dergâhına ḳulluḳ ḳıla

Pes ḳılan sensin senüñdür çünki fi‘l-ile kemâl

Kim ola tevḥîd ḥaḳḳan ẕâtıñı ẕikr eyleye

Eyleyen sensin senüñdür çünki luṭf-ıla kemâl

Kim ola elfâẓ-ı ma‘nâdan kelâmıñ söyleye

Söyleyen sensin senüñdür çün lisân-ıla kemâl

Kim ola kim enbiyâdan göstere bir mu‘cizât

Gösteren sensin senüñdür mu‘cizât-ıla kemâl

Kim ola kim evliyâdan ḫalḳa ol burhân ola

Pes olan sensin senüñdür çün delîl-ile kemâl

Kim ola kim evliyânıñ ḳapusında bekleye

Bekleden sensin senüñdür çünki ‘aşḳ-ıla kemâl

Kim ola cürm ü ḫaṭâdan nefsini ṭâhir ḳıla

Pes ḳılan sensin senüñdür çünki ‘afv-ıla kemâl

Kim ola kim ġayr-ı Ḥaḳdan ṣaḳlaya dil mülkini

Ṣaḳlayan sensin senüñdür çünki ḥıfẓ-ıla kemâl

Kim ola mâsivâdan ḳurtara cân sırrını

Ḳurtaran sensin senüñdür çünki sırr-ıla kemâl

Kim ola kim seyr-i ma‘a’llâh seyrine sırr irgüre

İrgüren sensin senüñdür çünki seyr-ile kemâl

Kim ola Ümmî Sinâna luṭf-ıla ḳahr eyleye

Eyleyen sensin senüñdür ḳahr u luṭf-ıla kemâl