Ey göñül çatmadı saña kimse baş

Ey göñül çaṭmadı saña kimse baş

Bâri ṭurma yaluñuz bellerden aş

Cehd ḳıl kim irişesin menzile

Niçe bir aḳa gözüñden acı yaş

Ḫalḳ-ı ‘âlem ḥâline aldanmaġıl

Saña maṭlûb olmayısar bir ḳumaş

Key ṣaḳın bend olma ḥîle bendine

Dime ehl-i beyt oġul ḳız ḳaravaş

Merd olup merdâne gir meydâna sen

Ya bu yolda bite iş ya kopa baş

Ol beḳâdan bu fenâya şol Ġanî

Niye ṣaldı ḳıl tefekkür gizli fâş

Mâl ü mülk ü ehl-i beytiñ ne ki var

Baġlamaḳ ister seni idüp ṣavaş

Key ṣaḳın aṣlıñdan ırma öziñi

Her ne ḳılursañ ḳılup ‘aşḳa ulaş

Ol beḳâ mülkünde bâḳî ḳalmaġa

Dü cihân naḳşını dilden ḳıl ṭırâş

Ol dükenmez kenze mihmân olmaġa

Ger olasın ‘aşḳ öñinde ke’l-ferâş

Ḳurtaram dirseñ başı Ümmî Sinân

Cümle şeyden arınup ‘aşḳa bulaş