Ey göñül geç bu fenâdan şöyle bî-‘âr ol yüri

Ey göñül geç bu fenâdan şöyle bî-‘âr ol yüri

Bülbül iseñ ol gül içün dün ü gün zâr ol yüri

Var ḥâliñe meskenet baġla öziñe ḳıl sükût

Kimsenüñ ‘aybın yüzine urma settâr ol yüri

Bil saña lâyıḳ olan ol Ḫâliḳa ḥamd ü ṯenâ

Cümleyi andan bilüben ṣıdḳ u iḳrâr ol yüri

Feẕkürûnî ol dün ü gün dürişügör derd-ile

Ḥâl içinde hem-dem-i Seyyid-i Muḫtâr ol yüri

Ol cemâliñ vaḥdetine irmek isterse cânıñ

Terkini ur dü cihânıñ ‘aşḳ-ıla yâr ol yüri

Asker-i nefsi tâlân eyle gider bîgâneyi

Bu vücûduñ ḫânesine miṯl-i Ḥaydâr ol yüri

Eyle şâẕî ḳıl cemâ‘at zümre-i rûḥânîyi

İrişüp vaṣl-ı sürûra ehl-i dildâr ol yüri

Gör ene’l-ḥaḳ menzilini Manṣûr-ı Baġdâd gibi

Merd iseñ bu ḥâl içinde sırr-ı ber-dâr ol yüri

Ey Sinân Ümmî nisâna irdi çün kim bu ṣadef

Ḳadrini bil baḥr içinde dürr-i şehvâr ol yüri