Ey felek n’itdüm saña hôş baġladuñ bâġ üstine

Ey felek n’itdüm saña ḫôş baġladuñ bâġ üstine

Urduñ işbu yüregime daġları daġ üstine

Ḫôş ḳaçardum mekr ü siḥriñden senüñ ḳurtulmayup

Neyleyeyüm ḫôş getürdüñ sen meni aġ üstine

Ne ‘aceb nerd oynaduñ oynuñı ey çarḫ-ı felek

Her neden men ḳaçdum ise uġraduñ çaġ üstine

Gel yüzüme gülme hergiz aġladursın ‘âḳıbet

İçürürsin zehriñi bir gün bal u yaġ üstine

Âferîn olsun senüñ bu siḥriñün üstâdına

İndürürsin kim ki yüksek uçsa duzaġ üstine

Niçe bir aġyâra uyarsın göñül sen âh u vâh

Ḳaçdıġumca uġradursın sen beni daġ üstine

Günde bir iş gösterür her bir işi ‘aksinedür

Ey göñül düşme ṣaḳın sen bâġçe vü bâġ üstine

Aşḳ-ıla kim dü cihânıñ varlıġın terk eyledi

Şöyle bil Loḳmân ‘ilâcın istemez ṣaġ üstine

Yalıñuz işbu fenâdan bulmadı kimse ḫalâs

Ey Sinân Ümmî düşegör bir yüzi aġ üstine