Ey diriġâ külli râhatlar baña oldı harâm

Ey diriġâ külli râḥatlar baña oldı ḥarâm

Derd-i ‘aşḳıñ leşkeri cân iḳlîmin ḳıldı merâm

Niçe bir yanup ṭutuşursın eyâ cân u ciger

Bir meded yoḳ mı senüñ bir derdiñe ola senüñ arâm

Baḥr-ı ‘aşḳıñ mevci başdan aşdı nidem âh âh

Âcizem âvâreyem ben ḳancaru gidem varam

Ey bu derde uġrayup ḥâlim bilenden bir kişi

Virmedüñ yâ Rab baña kim derdime dermân ṣoram

Derd-i ‘aşḳıñ cür‘asından bir ḳadaḥ nûş eyledüm

Anuñ içün âh idüp ḥasret odına yanaram

Gözümüñ yaşı aḳar yandı ciger biryân olup

Ey Ḫudâ derdiñ ḳapusından devâsın umaram

Yâ İlâhî sen bilürsin ḥâlimi ey Pâdişâh

Senden olmazsa ‘inâyet ġayrı kime yalvaram

Bu fırâḳ-ı ḥasret içinde ‘aceb ben bî-nevâ

Niçe bir ḫıdmet ḳıluban yâ niçe iş başaram

Yaġma ḳıldı ‘aḳlı cânı göñli ‘aşḳıñ ‘askeri

Ḳancaru ‘azm eyleyem yâ ḳancaru gidem varam

Ḳalmışam ḥayrân u sergerdân olup ḥayretdeyem

Bilmezem bu mürġ-ı sevdâyı ne yaña uçuram

Hecriñ odı bükdi elif ḳaddimi dâl eyledi

Bilmezem bu çarḥıñ elinden nice baş ḳurtaram

Çün dürişdüm râh içinde ḳılmaduñ ey Ḥaḳ revâ

İstedüm bir ḥâle ḥâldaş yola yoldaş aparam

Senden âḫar kimseden yoḳdur vefâ bildüm bugün

Aġlayu geldüm ki fażlıñ ḳapusında oturam

Umaram kim ol Ḥabîbiñ ḥurmeti-y-çün nâ-gehân

Bir naẓar ḳılup diyesin kim baña gel bi-çâram

Ey Ḫudâ senden Sinân Ümmî temennâ ḳıldıġı

Mürvetiñden ol Resûlüñ bâbına el ḳavşuram