Ey bülbül-i şeydâ

Ey bülbül-i şeydâ yine efgâna mı geldin

Azm-ı gül edip zâr ile giryâna mı geldin

Pervâne gibi âteşe dâ'im cân atarsın

Evvelde bu aşk oduna sen yana mı geldin

Yağmur gibi yağarsa belâ sen baş açarsın

Cân vermeğe dost yoluna kurbâna mı geldin

Her şey çalışır bir sıfatı eyleye ma'mûr

Sen cümle sıfat ilini virâna mı geldin

Vech-i ahadiyyet ki şu eşyâda görünmüş

Bu kesrete ancak anı seyrâna mı geldin

Bir kimse senin olmadı hiç zârına mahrem

Bilmem bu cihân içine yek-dâne mi geldin

Bu hasta Niyâzî'ye şifâ remzin edersin

Derde düşenin derdine dermâna mı geldin