Ey bize ta‘n eyleyen gör merd-i meydânam bugün

Ey bize ṭa‘n eyleyen gör merd-i meydânam bugün

Ḥamdü li’llâh çoḳ şükür hem kâmil insânam bugün

Yedi deryâda yunaldan ḳalmadı ‘iṣyânımız

Tevḥîd-i ẕâta irelden ‘afv u ġufrânam bugün

Meskenet bâbında gerçi ḫâke yeksânam velî

Cân göziyle baḳ göresin sırr-ı sulṭânam bugün

Biz fenâ-ender-fenâ olduġumuz ṭañ gelmesün

Mürşid-i kâmil yüzinden vaṣl-ı sübhânam bugün

Bilmeyen bilmez Ḥaḳı Peyġamberi bize ne ṭañ

Ehl-i ‘irfân ‘aşḳına ben ehl-i ‘irfânam bugün

Zu‘m-ı bâṭıl zümresinden añlamañ ‘âşıḳları

Muṣṭafâdan Murtażâdan ṣâḥib-erkânam bugün

Ten göziyle görmeg-ile kimse bilmez ḥâlimiz

Meger ol Ḥaḳ bildire kim cânlara cânam bugün

Göñlümüzde ġayrı şeyden ḳalmadı hergiz beḳâ

Ḥaḳ Ta‘âlâ sevgüsinden ‘aşḳa mihmânam bugün

Nûr-ı Yezdâna irelden ġarḳa vardı ‘aḳl u cân

Dir Sinân Ümmî ‘acâyib baḥr-ı ‘ummânam bugün