Evliyânıñ bâbına esrârın tuyan gelür

Evliyânıñ bâbına esrârın ṭuyan gelür

Ahd eyleyüp ezelden ḳavlına uyan gelür

Ġayr-ı Ḥaḳḳa Ḥaḳ diyen ‘aşḳa göñül virmedi

Aşḳ odına varlıġın yoḳluġa ṣayan gelür

Ḥaḳ buyurdı ẕikr idüñ ben daḫı ẕikr ideyin

Erenler ṣoḥbetine Ḳur’âna uyan gelür

Kim ki sever Allâhı ġayrıyı ḳor va’llâhi

Bu yola cân u cihân terkine duyan gelür

Ḥaḳ buyurdı ẕikrime ṭan eyleyen ziyânlu

Muvaḥḥidiñ âvâzı münkire çıyân gelür

Erenler bâzârına yoḳluġuñ şikârına

Ḥaḳ yolında nefsiniñ putların ṣıyan gelür

Her kim ‘aşḳa yâr olur câna ṣafâ-kâr olur

Mâsivâdan dûr olur cevrine döyen gelür

Dört kitâbı oḳımaḳ ‘ayn u şîn u ḳâfıla

Gerçi güçdür zâhide ‘ârife ‘ayân gelür

Key ṣaḳın Ümmî Sinân nuṭḳ eyleme nâdâna

Câhile yâr olursañ aṣṣıña ziyân gelür