Esicek bâd-ı sabâ aklıma san şâne değer

Zîra evvel eser ol zülf-i perîşâna değer

Zülfü müşküyle mu'attar olur ol demde dimâğ

Geçer andan gönüle hem erişir câna değer

Leb ü dendânı hevâsıyla akan göz yaşının

Birisi ma'nâda bin lü'lü vü mercâna değer

Gam-ı hicri ile âhı ana âşık olanın

Çıkar eflâke iner tâ yedi nîrâna değer

Yüzünün mihrine karşı dolaşan zerrelerin

Birinin nûru nice mihr-i dırahşâna değer

Eşiğinde baş urup sıdk ayağın berk basanın

Başı arşa kürsi-i Rahmân'a değer

''Lî-menî'l-mülk'' nidâsın işiden cân kulağı

Anı cânından işidir yine cânâne değer

O nidâyı işidir ''men aref''e vâkıf olan

Lîk ol ma'rifeti sanma her insâna değer

Sana bir cezbe Niyâzî ki o dostdan yetişe

Dükeli ins ile cinne olan ihsâna değer

Son Yazılar