Dâg-ı derûnı açmayayım yâre bir dahi

Dâg-ı derûnı açmayayım yâre bir dahi

Fâş itmeye bu sırrımı agyâra bir dahi

Sad-pâre pâre sîneme bak ey tabîb-i cân

Ölmekden özge var mı buña çâre bir dahi

Dün seyre çıkdı gördi o serviñ hırâmını

Dil meyl ider mi seyr-i çemen-zâra bir dahi

Cûlardır eşkim andaki müjgânım oldı şâh

Tâ haşr olunca bakmayam eşcâra bir dahi

Nâlemden ol şeh eyler ise kîn ü infi‘âl

Ol sûya varmaz ‘âşık-ı bî-çâre bir dahi

Hayli zamândır almadım ol goncadan peyâm

Baş egmez oldum çarh-ı sitem-kâra bir dahi

Ey dil ma‘ârif ehli Nesîbâ-yı şâ‘iri

Görse bakar mı sendeki eş‘âra bir dahi

Leylâ safâdır cân u dile bu nazîremiz

Olmazsa gam mı zahm-ı dile çâre bir dahi