Dilerse gözimi giryân iden dôst

Dilerse gözimi giryân iden dôst

Dilerse baġrımı biryân iden dôst

Dilerse ḫâk -ile yeksân iden dôst

Dilerse luṭf-ıla iḥsân iden dôst

Dilerse göñlimi ḫandân eyleyen

Dilerse cânımı cânân eyleyen

Dilerse sırrımı seyrân eyleyen

Dilerse ḳatremi ‘ummân iden dôst

Dilerse ṣu gibi aḳup çaġladan

Dilerse yil gibi esüp soyladan

Dilerse fir ḳate ṣalup aġladan

Dilerse vaslını iḥsân iden dôst

Dilerse şâh iken ḳılan gedâlar

Dilerse zecr idüp ḳılan cefâlar

Dilerse ḫôr iken viren ṣafâlar

Dilerse ḳul iken sulṭân iden dôst

Dilerse deryâlar gibi ḳaynadan

Dilerse gemiler gibi oynadan

Dilerse nâleler virüp söyleden

Dilerse nuṭḳumı pinhân iden dôst

Dilerse gezdiren ‘arşı semâyı

Dilerse bozduran nâm-ı fenâyı

Dilerse geydüren şâlı ḳabâyı

Dilerse cismimi uryân iden dôst

Dilerse aşḳını câna ḳuran faḳ

Dilerse söyleden sırran ene’l-ḥaḳ

Dilerse varımı alup iden yoḳ

Dilerse kim Ümmî Sinân iden dôst