Dilde Hakdan ġayrı güftâr eylemez dervîşler

Dilde Ḥaḳdan ġayrı güftâr eylemez dervîşler

Cânda ‘aşḳdan ġayrı bir kâr eylemez dervîşler

Lâ-mekândan geldiler evvel yine andan âḫar

Ḳonmaġa bir mülke iḳrâr eylemez dervîşler

Dünye vü ‘uḳbâ hevâsın dem-be-dem medḥ eyleseñ

Ḥubbunı ḳalbinde hiç var eylemez dervîşler

Cân virüp cânânı bulmaḳdur murâd ancaḳ hemân

Bunda bundan özge bâzâr eylemez dervîşler

Ẕikr olunsa dôst ḳanda gözden aḳar acı yaş

Sevmege Allâhını ‘âr eylemez dervîşler

Mürşid-i kâmil yüzinden seyr idüp dildârını

Ḥaḳ bilür kim meyl-i aġyâr eylemez dervîşler

Yâr elinden yaralansa yanduġından şâd olur

Gam çeküp ol derde tîmâr eylemez dervîşler

Kanda varsa ‘aşḳa uyar ḳalbi ‘arşu’llâh olur

Ḥırṣa virüp göñlini dâr eylemez dervîşler

Döşegi ṣabrıñ tevekkül yaṣdıġına söykenüp

Ḥaḳdan ayruḳ kimseden çâr’eylemez dervişler

Gelse ḳaçmaz ḳaçsa ḳoġmaz cengi yoḳ dünyâ-y-ıla

Naḥnü ḳasemnâdan iḳrâr eylemez dervişler

Mâsivâ rengin ḳoma dilden ṣaḳın Ümmî Sinân

Ẕât-ı Ḥaḳdan ġayrı efkâr eylemez dervîşler