Dervîş olanıñ göñli virândur

Dervîş olanıñ göñli virândur

Derd-i yâr-ıla cigeri ḳandur

Gizlidür ḥâli ṭoġrıdur yolı

Baġçesi güli tâze ṭurandur

Ḫalḳ-ıla daşı Ḥaḳḳ-ıla işi

Top idüp başı yola girendür

Gezer cihânı sever Sübḥânı

Mürşid eline yüzler sürendür

Ne gelse başa yimez endîşe

Tevekkül Ḥaḳḳa ḳılup ṭurandur

Bulsa bir işin aḳıdur yaşın

Top idüp başın Ḥaḳḳa irendür

Kimse bilimez arar bulımaz

Daşın gözleyen maḥrûm ḳalandur

Daşına baḳan göñlini yaḳan

Şol ġayr-i Ḥaḳḳa göñül virendür

Yürür sırr-ıla özi nûr-ıla

Aşḳ-ı yâr-ıla beñzi ṣolandur

Bülbüldür güle ḳarışmaz ile

Dôstuñ envârı gülin direndür

Ümmî Sinâna düşme gümâna

Bir gizli kâna eli irendür