Darb-ı zikriñ sohbetinde cânı hayrân eylegil

Darb-ı ẕikriñ ṣoḥbetinde cânı ḥayrân eylegil

Ḳalmasun çek bir özüñde baġrı biryân eylegil

Lâ diyen illâ dimez evvel bazârda añladum

Ger naṣîbiñ var ise illâda seyrân eylegil

Perdeler ḳat ḳat ḥicâb oldı saña aç gözüñi

Aṣlıña irmek dilerseñ cânı ‘uryân eylegil

İsm-i ẕâtıñ feyż-i nehrinden ṣuvardılar şehrini

Ḳalmasun ḳatre vücûduñ baḥr-ı ‘ummân eylegil

Cehl ü nâdân ġayretinden ḳalma ḳaldur başıñı

Geç bu ṣûretden seni sen kâmil insân eylegil

Aşḳa yâr ol gel berü sen dôstı düşmân añlama

Seyr-i fi’llâh illerine merd cevlân eylegil

Ẕât-ı Ḥaḳḳa doġrı varan kârbân ehlinden ol

Olmasun yañlış işiñde yoluñ âsân eylegil

Ṭayyib ü ṭâhir olunca tâ ki ḳalbiñden maraż

Bekle sen Loḳmân eşigin derde dermân eylegil

Ey Sinân Ümmî ‘ömür ḫarc itme nâsût ehline

Ârifâna yek naẓar ḳıl sırr-ı pinhân eylegil