Cür’adân abdâla gerçi mahzenü’l-esrârdur

Cür’ adân abdâla gerçi mahzenü’l-esrârdur

Rind-i dürd-âşâma sâgar matla’ u’l-envârdur

Gülsitân-ı bezme sâgar gonca-i sîr-âb ise

Âteşîn ruhsârı sâkînüñ de bir gül-nârdur

Her gedâ-tab’ anlamaz âyîn-i Cemdür bezm-i mey

Bunda bir şâhâne tavr u özge ‘ âlem vardur

Dâm-ı âgûş içre düşmez ol tezerv-i hoş-hırâm

Dâne-i eşküm egerçi lü’lû-yı şeh-vârdur

Aşk ile kaddüñ büküp Zünnûn-ı vakt olsañ yine

Kâm-rân ol kimsedür kim Mâlik-i Dînârdur

Mihr-i ‘ âlem-tâb olupdur ol büt-i mehveş bu gün

Aña nisbet mâh-ı enver sûret-i dîvârdur

Ol sanemden Bâkıyâ bir bûse da’ vâ kıl yüri

Söylemezse öp hemân agzın sükût ikrârdur