Bî-mekânım bunda ben sanman ki bünyâz eyledüm

Bî-mekânım bunda ben ṣanman ki bünyâẕ eyledüm

Baḥr-ı muṭlaḳdur mekânım bunda pervâz eyledüm

Ol ḥaḳîḳat baḥrınıñ pür-tâb iden mevci benem

Aşḳ-ıla geldüm cihâna cisme ṭalaz eyledüm

Ava ṣaldı ol ḥaḳîḳat şâhınıñ şehbâzıyam

Avladum bunda şikârım ördek ü ḳaz eyledüm

Cân Yûsufın câha ḳoydum bir zamân zâr eyledüm

Ḥamdü li’llâh ẓulmetinden nefsimiñ şâẕ eyledüm

Bî-niyâzım ‘âlem-i keṯret hevâsından bugün

Vaḥdetiñ envâr-ı ẕevḳın Şâha niyâz eyledüm

Ḥâlime yâr olmayan vâḳıf degül esrârıma

Aşḳ-ıla kim yâr olursa ta‘lim-i râz eyledüm

Cânı çevgân, başımı ṭop eyledim dergâhına

Aşḳı meydânında Şâhıñ añlamañ nâz eyledüm

Bir zamân gülzâr içinde ḫâr elinden aġladum

Verd ü reyḥânım bulınca âh u feryâẕ eyledüm

Bir zamân nefsiñ hevâsı ḳapladı cân iḳlîmin

Ṭoġdı ‘aşḳıñ âfitâbı ḳışımı yaz eyledüm

Pâdişâh-ı Lâ-yezâliñ şem‘iniñ pervânesi

Olmaġ-içün göñlümi ġayrıya aḳmaz eyledüm

Dir Sinân Ümmî bize lâzım degül ġayrı mekân

Mürġ-i lâhûtem anuñ-çün meskeni az eyledüm