Bâg u bahâr-ı gül-şen-i ‘âlem hazânludur

Bâg u bahâr-ı gül-şen-i ‘ âlem hazânludur

Bezm-i safâ hemîşe gül ü ergavânludur

Der-bend-i gamda beñzedi hakkâ o gamzeler

Reh-zenlere ki elleri tîr ü kemânludur

Âlûdedür hemîşe dem-i zahm-ı sîneden

Bilmez miyin o gamze-i hûnî ne kanludur

Devr-i ruhuñda kaldı kamer künc-i hânede

Nâmı egerçi haylî zamândur nişânludur

Ol lebler ile aş yirer belki kanuma

İmrenmesün dehânı meded iki cânludur

Bâkî sözini vasf-ı lebüñ şehd-i nâb ider

Şîrîn kelâmı anuñ içün böyle şânludur