Bugün bu ‘aşkıñ içinde vicdânımız eksik degül

Bugün bu ‘aşḳıñ içinde vicdânımız eksik degül

Ḫudânıñ ḳurb-ı ẕâtında seyrânımız eksik degül

Bu ‘aşḳıñ ḫaymesin ey şâh ḳuraldan oldı ḫôş dergâh

Yedi iḳlîme ḥükm eyler sultânımız eksik degül

Gelicek ceẕb-i Rabbânî ḥalâldur ‘âşıḳıñ ḳanı

Virür dôst yolına cânı ḳurbânımız eksik degül

Maḥabbet şerbetin her kim içerse kendüden geçer

Şarâb-ı ‘aşḳı nûş ider mestânımız eksik degül

Kemâlım vaṣfın isterseñ Muḥammed Muṣṭafâdandur

Veliler içre devr ider erkânımız eksik degül

Ḳodılar mâsiva’llâhı ḳılurlar ârżû ol Şâhı

Çekilür dün ü gün ṭurmaz kârbânımız eksik degül

Bu tevḥîdiñ müsemmâsın ṭaleb ḳılan bugün gelsün

Âşıḳlar ṭalıban oynar ‘ummânımız eksik degül

Gelür ol baḥr-ı muṭlaḳdan ledünnî ‘ilminiñ feyżi

Dolar ḳalbe aḳar dilden ‘irfânımız eksik degül

Sinân Ümmî bu meydâna girelden ḫôş ṣafâ buldı

Bizüm bu derdiñ içinde dermânımız eksik degül