Bugün ‘aşkıñ bâzârında dürr ü mercân satar dilim

Bugün ‘aşḳıñ bâzârında dürr ü mercân ṣatar dilim

Yârıñ cemâli bâġında verd ü reyḥân ṣatar dilim

Dört kitâbıñ aṣlı ezel tevḥîd-i ẕâtıñ sırrıdur

Dellâllıġı degdi bize sırr-ı Ḳur’ân ṣatar dilim

Âlem-i nâsût ehline yoḳdur benüm bey‘im şirâm

Ehl-i vaḥdet ‘âşıḳlara gizli ‘irfân ṣatar dilim

Âḫir zamân Loḳmânıyam gelsün beri derdin bilen

Ḥikmet ‘ilmine ireli derde dermân ṣatar dilim

Ẓann u gümândan ḳurtulan gelsün şehâdet dârına

Alsun ene’l-ḥaḳdan ḫaber kâmil îmân ṣatar dilim

Ḫıẕmet eşiginden giren genc-i me‘ânî evine

Gelsün bugün ‘aṭṭârıyam nûr-ı Yezdân ṣatar dilim

Ümmî Sinân eydür gelen kimdür baña mihmân olan

Cân Yûsufın kimdür alan Mıṣra sulṭân ṣatar dilim