Bu derde uġrayan kişi

Bu derde uġrayan kişi

Dîvâne olur ḫûludur

Böyledür bu ‘aşḳıñ işi

Her kim uyarsa delüdür

Feẕkürûnî didi Ḫudâ

Ḳur’ân-ıla itdi edâ

Âşıḳlar mest olur Hûda

Hem sükker-ile balıdur

Zâhid ṭoġrı söyle sözi

Daḫl odına yaḳma bizi

Ḥaḳḳı sevenleriñ yüzi

Gerçek erleriñ yolıdur

Âşıḳlarıñ âh itdügi

Düni gündüze ḳatduġı

Bülbülüñ efġân itdügi

Baġçe degüldür gülidür

Derd-ile devrân eylemek

Cigeri biryân eylemek

Dîdârı seyrân eylemek

Bunlaruñ genc ü mâlıdur

Münkir yüri var ḥâliñe

Diken döşeme yoluña

Sunarsañ girmez eliñe

Aşḳıñ maḳâmı uludur

Ümmî Sinân söyledügi

Aşḳ deñizin boyladuġı

Nedür gör şerḥ eyledügi

Ṣâdıḳlarıñ aḥvâlıdur