Biri biriyle müjgan safları gavgâya girmişdir

Nigâh-ı gamze gûyâ sulh içün araya girmişdir

İşitdim dür sadef pîrâhenin çâk eyleyüp çıkmış

Meger ol dil-ber-i sîmin-beden deryâya girmişdir

Dediler şehr-i nâz-âbâd içinde işve sûkunda

O tâcir-beççe bir dükkân-ı istiğnâya girmişdir

Temâşâ eyleyüp âyîne içre aks-i ruhsârın

Kıyâs etdim perîdir sihr ile mînâya girmişdir

Fürûğu kûhsâr-ı âheni âb eylemek mümkin

Ol âteş kim hayâlinle dil-i şeydâya girmişdir

Bugün pek ser-firâz u şâdman gördüm Nedîmâyı

Meger kim meclis-i mahdûm-ı bî-hemtâya girmişdir

Nedîm

Son Yazılar