Bir yüze duş oldu gözüm yüz bin gezer dîvânesi

Olmuş cemâli şem'inin ay ile gün pervânesi

Kendi sunar dolu dolu peymâneler âşıklara

Bir kez elinden nûş eden olur ebed mestânesi

Şunlar ki tatmadı ezel bezminde anın cür'asın

Tatmaya bunda dahi ol aşk ehlinin bîgânesi

Her bir kuru lâf ehli dâhil olamaz bu meclise

Ol câna kıymaz nice gel desin ana cânânesi

Aşk ehli ayılmaz ezelden tâ ebed serhoş olur

Pes nice ayılsın ki dâim devr eder peymânesi

Bir mülke mâlik eylemiş uşşâkını ol pâdişâh

Mülk-i Süleymân anların yanında bir vîrânesi

İki cihânda Mısrî'ye devlet dahi izzet yeter

Geldikçe yârin sunduğu gevherlerin her dânesi

Son Yazılar