Bir ser-âmed serv-i hoş-reftâra düşdi gönlimüz

Bir ser-âmed serv-i hoş-reftâra düşdi gönlimüz

Yine el virdi hevâ âvâre düşdi gönlimüz

Şem`-i bezm-ârâ gibi niçün yanup yakılmazuz

Nâ-gehân bir âteşîn ruhsâra düşdi gönlimüz

Aşk dâmına tutılmakdan iderken ihtirâz

Dâne-i hâlin görince dara düşdi gönlimüz

Pây-bend-i `aşkdan bir dahı olur mı halâs

Kâkül-i pür-pîç-i müşgîn-târa düşdi gönlimüz

Bir hâzef-pâreyse de Yahyâ güher kadrin bilür

Asitân-ı Hazret-i Hünkâra düşdi gönlimüz

Hazret-i Sultân Murâd'un medhini itdi penâh

Jâledür gûyâ ki bir gülzâra düşdi gönlimüz