Bir derdim var ‘âlemde biñ dermânı neylerem

Bir derdim var ‘âlemde biñ dermânı neylerem

Bir cânânım var cânda yüz biñ cânı neylerem

Ben bu ‘aşḳa irelden dôsta ḳurbândur cânım

Bî-nişândur mekânım ben mekânı neylerem

Ben bu ‘aşḳa düşmesem yanuban ṭutuşmasam

Derd odında pişmesem ad u sanı neylerem

Ġayrısından el çeküp istedügüm derdidür

Derdin virmezse baña dü-cihânı neylerem

Ben bu ‘aşḳa irince ḫayli zamân aġladum

Araduġum bulmuşam çün kalanı neylerem

Ben bu ‘aşḳa yâr oldum hem bir ile bir oldum

Hem Mûsâ hem ṭûr oldum len terânî neylerem

Gel oldı ben ġâfile ‘ayn ü şîn ü ḳâf-ile

Dersi yârdan almışam ‘ilm-i fânî neylerem

Ben bu derde uġradum yoḳluġı kâr eyledüm

Ḥacc u zekât u ṣıfât armaġanı neylerem

Ümmî Sinânıñ cânı dâ’im ‘aşḳıñ fermânı

Dir anuñ-içün îmânı ben ‘iṣyânı neylerem