Bir Allâhı zikr ideniñ gümânı hep ‘ayân olur

Bir Allâhı ẕikr ideniñ gümânı hep ‘ayân olur

Ni‘metine şükr ideniñ müşkilleri beyân olur

Bir Tañrınıñ ilhâmıdur söyledigim añlayana

Ẓâhir ẕikri bâṭın fikri cân evinde îmân olur

Gördücegüm söyleyeyin ‘aceblemeñ ḥâlim bilen

Ẓâhir bâṭın fenâ bulan sır iline sulṭân olur

Ṭop eyleyüp cân u başı her kim ki meydâna gele

Ẓulm eylemez Allâh aña hidâyeti burhân olur

Egri temeliñ üstine ṭoġrı tamâm olmaz binâ

Kim ki yoldan döner girü da‘vâsı hep yalan olur

Kim ki ḫalḳa döner yüzin dûr ider ol Ḥaḳdan özin

Baġlar anuñ ṣûret gözin görmez yolı ṭuman olur

Cân u cihânıñ terkini niyyet ipiyle baġlayan

Baġlayumaz bir şey anı düşvâr işi âsân olur

Baḥr-ı ẕâtıñ perteviniñ mevci gelür ṭurmaz aña

Maḥv eyleyüp varlıġını bir ḳaṭresi ‘ummân olur

Yoḳdur Sinân Ümmî gibi gerçi bu yolda bir gedâ

Niyyeti ḫâliṣ olmaġın yardımcısı ol Ḫân olur