Ben baña yâr olduġumca yârı aġyâr bulmuşam

Ben baña yâr olduġumca yârı aġyâr bulmuşam

Baña aġyâr olduġumca anı ben yâr bulmuşam

Görmedüm pervâne şem‘a vara biryân olmaya

Şem‘a yaḳın varduġumca özümi nâr bulmuşam

Bülbül irincek bahâra derdi arṭar dem-be-dem

Bülbülüñ artduḳça derdi bâġı gülzâr bulmuşam

Ten murâdın terk idendür cân murâdın avlayan

Aḳl u cândan geçdügümce sırdan esrâr bulmuşam

Aşḳa fermân olmayanlar varlıġından geçmedi

Kim ki ‘aşḳa yâr olursa dâra ber-dâr bulmuşam

Ẓâhir ü bâṭın kemâlât Pâdişâhıñdur beyân

Bâṭına geçdüm ẓâhirden ṣun‘-ı Settâr bulmuşam

Lâ dimez ehl-i hidâyet tevḥîdiñ ‘irfânına

Yâra vuṣlat bulduġumca âh-ıla zâr bulmuşam

Aşḳa fermân olduġum ‘ayb olmasun añlayana

Dir Sinân Ümmî bu yolda ben ‘aẓîm-kâr bulmuşam