Be yârenler nazar kıldum ‘âleme

Be yârenler naẓar ḳıldum ‘âleme

Cânından ayrılan tenler iñiler

Ne gelürse söyler oldum dilime

Teninden ayrılan cânlar iñiler

Kimdür bu dünyâda güldüm diyenler

Maḳṣûdum murâdum buldum diyenler

Ḳanı şol yârdan ayrıldum diyenler

Aḳıdup gözinden ḳanlar iñiler

Fânîsin hey fânî cihân fânîsin

Derd-ile miḥnetiñ tamâm kânısın

Kimi eşin aldırmış kimi yavrısın

Âh idüp derdile şunlar iñiler

Bu ayrılıḳ bir ‘acâyib ḥâlımış

Bunda gelen uġrar ulu yolımış

Bülbülüñ efġânı hemân gülimiş

Oḳuyup dürlü destânlar iñiler

Ümmî Sinân eydür çıḳma yoluñdan

Allâhıñ ẕikrini ḳoma diliñden

Ṣabr it yüri var ne gelür eliñden

Sevdüginden ayrılanlar iñiler