Bağrımı pür-hûn eder şol çeşm-i mestân ile bahs

Dağıdır aklımı şol zülf-i perişân ile bahs

Leblerin feyzine mu'tâd eyledin çün ağzımı

Dilemez kim eyleye şol âb-ı hayvân ile bahs

Dürr ü yâkût-ı dehânın seveli dilber senin

Gelmez oldu dile hergiz lal u mercân ile bahs

Vechin üzre yazılan manâ-yı Kur'ân'ı gören

Eylemez evrâk içinde lâfz-ı Kur'ân ile bahs

Cümle fitne kaşın ile kirpiğinden olduğun

Bilen eder mi cihânda nefs ü şeytân ile bahs

Şol ruhunla hattının sırrını zâhid anlasa

Kürsi üzre eylemezdi küfr ü imân ile bahs

Pertev-i nûr-ı cemâlin aksidir şems-i cihân

Ne münâsib ede ol nûr mâh-ı tâbân ile bahs

Cem vü tafsilin rumûzun anladınsa ebsem ol

Etme andan sonra asla kul u sultân ile bahs

Zerre iken sen Niyâzî rûh-ı a'zam sırrına

Haddini bil kılma ol şems-i dırahşân ile bahs

Son Yazılar