Baña ‘aşkı soran gelsün haber alsun kumâşımdan

Baña ‘aşḳı ṣoran gelsün ḫaber alsun ḳumâşımdan

Nicedür vaṣfını bilsün yaḳarsa bu ataşımdan

Ḥaḳâyıḳda beni Allâh yaratdı ‘aşḳ-ıla evvel

Anuñ-çün bile gönderdi ayrılmayam baṭâşımdan

Aḳaram gâhî çaġlaram âh ider gâhî aġlaram

Virür bu ‘aşḳ baña dürlü ṣafâlar acı yaşımdan

Eger ḳâl olsa ḥâl eyler eger zehr olsa bal eyler

Ṣalâdur ni‘met-i ‘aşḳa umarsa kim bu aşımdan

Eger ‘aşḳ olmasa ey yâr meni almış idi aġyâr

Kimüñledür benüm cengim bilür ‘ârif savaşımdan

Bu ‘aşḳıñ ḳıymeti olmaz iki ‘âlemde bulunmaz

Baña leẕẕet olan oldur te‘ayyündür göz ḳaşımdan

Ḳaçan nefsiñ hevâsından vücûdum perde ḳaplarsa

Bi-külli maḥv ider bu ‘aşḳ ḳomaz bir ḳurı yaşımdan

Görünmez ṣûretâ illâ meni terk eylemez aṣlâ

Ḳaçan baña ecel irse götürseler firâşımdan

Ölem ṭopraḳ ola tenim ulaşa aṣlına cânım

Umaram ‘aşḳ eṯer vire ile ṭopraḳ u ṭaşımdan

Kıyâmet ḳopıcaḳ ṭuram binem ‘aşḳ atına sürem

Çaġıram dôst diyem varam ıram sevdâyı başımdan

Sinân Ümmî bu ‘aşḳ-ıla nice sulṭân olur añla

Dir âmennâ ve ṣaddeḳnâ bilen bu sırrı fâşımdan