Ala gözüñ ki âl-ile cânlar şikâr ider

Ala gözüñ ki âl-ile cânlar şikâr ider

Bir fitnedür ki devr-i kamer âşikâr ider

Aksi cemâlüñüñ ki irişmez aña hazân

Her kanda kim irişür-ise nev-bahâr ider

Gözüm hayâli şavkına ol servi kâmetüñ

Her dem ciger kanın-ahıdup cûy-bâr ider

Yüzüñe beñzedüp bahar ay u güne gözüm

Beñzemez işleri kişiye ıztırâr ider

Gamzeñ dahı ne kanuma göz kara eyledi

Yitmez mi ol cefâ ki baña rûzigâr ider

Gül yüzüñ iştiyâkı-y-ıla gözlerüm yaşı

Her nireye ki ugrar-ısa lâle-zâr ider

Vasfında la'lüñüñ düşicek fikre Ahmedî

Gör kim ne dürlü dürlü güher yâd-gâr ider