Ah-ı şerernâk ider bâdiye-pûyân-ı aşk

Ah-ı şerernâk ider bâdiye-pûyân-ı aşk

Hep şerer-i âhdur rîg-i beyâbân-ı aşk

Mümkin olurdı dilâ keştî-i câna halâs

Ateş-i sûzân ile olmasa tûfân-ı `aşk

Ateş-i dilden yine itdi `alevler zuhûr

Mevclerin gösterür var ise ummân-ı aşk

Havfum odur kim okun per yaka pervâneveş

Şevkün ile oldı dil şem`-i fürûzân-ı aşk

Gerçi ki yanmakda dil ahker-i sûzân ile

Lîk süveydâdadur âteş-i pinhân-ı aşk

Dâg-ı mahabbet yakar sînede erbâb-ı `aşk

Meyl-i çerâgân ider her gice sultân-ı `aşk

Dökmez idi eşk-i germ itmez idi âh-ı serd

Sîne-i Yahyâ eger olmasa sûzân-ı `aşk